Tala

Tala
by Danah

Minsan sa aking pag-iisa
Sinubukan kong tumingala
Ang tumitig sa pakislap kislap na liwanag ng mga tala
At nahumaling ako sa taglay nilang ganda

Naalala ko tuloy ang pangako ng May Likha
Na magiging kasing dami ng tao ang mga tala
Na Kanyang pag-iingatang ihulma
At bibigyan ng makakasamang kapareha

Bigla tuloy akong napaisip
Dahil sa nilaki-laki ng daigdig
Naisip Niyang gumawa ng taong sakin'y magaalay ng pag-ibig
At ako sa Kanya ay mas ilalapit

Sa aking pag-iisip nabuo sa aking utak ang isang larawan
Isang nilalang na may maayos na pangangatawan
May katalinuhan at paninindigan
Matapang at may puso kung lumaban

Ngunit kahit na ano pang katangian ang aking ilista
Nais ko parin ang sa Diyos ay malapit siya
Hindi ba't mas maganda kung sabay kaming maglilingkod sa Kanya
Sa Kanya na may gawa sa aming dalawa

Mas maganda kung tayo ay magliliwanag ng magkasama
Dahil iingatan natin ang isa't isa
Tutupad ng mga pangarap sa pag-tanda
At sa mundo ay magiiwan ng liwanag at marka

Alam kong ako ay iingatan niya
Sapagkat minsan ng akong gumala sa mundo
Hinaras, sinaktan at umuwing bugbog sarado
Gusto ko na sanang sumuko

Sa mundong ginawa akong parang isang panyo
Ipinahid sa luha ng kung sinu-sino
At nang tuluyan ng mabasa ang mga parteng dating tuyo
Itinapon nalang basta papalayo

Alam kong may iba karing kwento
Mga kwentong nabuo bago pa tayo pinagtagpo
Dahil katulad ng mga tala na magkakalayo
Minsa'y dilim din ang bumabalot sa iyong mundo

Katulad ng mga tala na nakadungaw sa langit
Na pilit nagliliwanag kahit na madilim ang paligid
Ako ay maghihintay pagka't tayo ay magtatagpo rin
At sabay na sasayaw at lalago sa langit